Joe 1 | NdeIBE | STEP | Ilizwi likaJehova lafika kuJoweli indodana kaPhethuweli.

Joel 1

1 Ilizwi likaJehova lafika kuJoweli indodana kaPhethuweli.

Ukuhlasela kwezintethe

2 Zwanini lokhu, lina badala; lalelani lonke lina elihlala elizweni. Into enjengale seyake yenzakala na ezinsukwini zenu loba ezinsukwini zabokhokho benu?

3 Kutsheleni abantwabenu, abantwabenu labo bakutshele ababantwababo, abantwababo bakutshele isizukulwane esilandelayo.

4 Lokho okutshiywe ngumtshitshi wezintethe kudliwe yisikhongwane; okutshiywe yisikhongwane kudliwe yibuyane; okutshiywe yibuyane kudliwe ngezinye intethe.

5 Vukani lina zidakwa likhale! Lilani lonke lina banathi bewayini; lilani ngenxa yewayini elitsha, ngoba lihluthunwe ezindebeni zenu.

6 Isizwe sihlasele ilizwe lami, silamandla asingeke sibalwe, silamazinyo esilwane, ingavula zesilwanekazi.

7 Sesitshabalalise izivini zami, saqothula lezihlahla zami zemikhiwa. Sebule amaxolo azo sawaphosela khatshana, izingatsha zazo zasala sezimhlophe nke.

8 Lilani njengentombi egqoke isaka idabukele umyeni wobutsha bayo.

9 Umnikelo wamabele lomnikelo wokunathwa kususiwe endlini kaJehova. Abaphristi bayalila, bona abakhonzayo phambi kukaJehova.

10 Amasimu atshabalele, umhlabathi womile; amabele onakele, iwayini elitsha liphelile, amafutha kawasekho.

11 Delani, lina balimi, lilani, lina balimi bamavini; bubulelani ingqoloyi lebhali, ngoba isivuno sensimu sitshabalalisiwe.

12 Ivini lomile lomkhiwa ubunile; iphomegranathi, lelala lesihlahla samaephula – zonke izihlahla zeganga – zomile. Impela ukuthokoza kwabantu kuphelile.

Isimemezelo sokuphenduka

13 Vunulani amasaka, lina baphristi, likhale. Lilani lina elikhonzayo phambi kwe-alithare. Wozani, lilale lembethe amasaka ebusuku, lina elikhonzayo phambi kukaNkulunkulu wami, ngoba iminikelo yamabele leminikelo yokunathwayo igodliwe, kayanikelwa endlini kaNkulunkulu wenu.

14 Memezelani ukuzila okungcwele; bizani ibandla elingcwele. Memani abadala labo bonke abahlala elizweni, baye endlini kaJehova uNkulunkulu wenu, likhale kuJehova.

15 Maye ngalolosuku! Ngoba usuku lukaJehova seluseduze; luzafika njengencithakalo evela kuSomandla.

16 Ukudla akuzange kuphele phambi kwamehlo ethu – lokuthokoza kanye lokuthaba endlini kaNkulunkulu wethu na?

17 Inhlanyelo itshwabhene ngaphansi kwamagade. Izindlu zamabele zingamanxiwa, iziphala zidiliziwe, ngoba amabele kawasekho.

18 Yeka ukukhala kwezinkomo! Imihlambi yezinkomo iyaphithizela ngoba kayilamadlelo; lemihlambi yezimvu iyahlupheka.

19 Ngiyakhala kuwe Jehova, ngoba umlilo usuqede amadlelo lamalangabi asetshise zonke izihlahla zeganga.

20 Lezinyamazana zeganga zifuna wena; izifula zamanzi sezicitshile njalo lomlilo usuqede amadlelo.